Close

შეხვედრა ნავპაკტოსის მიტროპოლიტთან იეროთეოს ვლახოსთან

2020 წლის 24 აგვისტოს, ჯვართამაღლების სატაძრო კომპლექსის ეზოში, “ათონის დარბაზის” ორგანიზებით ღია ცის ქვეშ, სახელმწიფო რეგულაციების დაცვით შედგა ტელეხიდი დეკანოზ თეოდორე გიგნაძესა და ნავპაკტოსის მიტროპოლიტ იეროთეოს ვლახოსს შორის ჯვართამაღლების ტაძრის სამრევლოს მონაწილეობით.

შეხვედრაზე, რომლემაც ორ საათს გასტანა, სამრევლოს ახალგაზრდებმა მეუფე იეროთეოსს დაუსვეს სულიერ ცხოვრებასთან დაკავშირებული აქტუალური და პრაქტიკული კითხვები.

მსგავსი შეხვედრები მთელი მსოფლიოს მართლმადიდებლური სამყაროს ისეთ დიდ მოღვაწეებთან, როგორებიც არიან ლიმასოლის (კვიპროსი) მიტროპოლიტი ათანასე და ათონის წმინდა მთის ვატოპედის მონასტრის იღუმენი ეფრემი, ჯვართამაღლების ტაძრის სამრევლო ცხოვრების განუყოფელ ნაწილადაც იქცა.

დეკანოზ თეოდორე გიგნაძის სადოქტორო ნაშრომის დაცვა

2019 წლის 15 ივლისს, საქართველოს ტექნიკურ უნივერსიტეტში დეკანოზ თეოდორე გიგნაძის სადოქტორო ნაშრომის დაცვა გაიმართა.

 

„ეს ჩვენთვის, ტექნიკური უნივერსიტეტისთვის არის მოვლენა, ახალი სიტყვა, ახალი ნაბიჯი. ამ უფლების მოპოვება დიდი შრომის შედეგია“ – აკადემიურ საბჭოზე განაცხადა საქართველოს ტექნიკური უნივერსიტეტის რექტორმა, აკადემიკოსმა არჩილ ფრანგიშვილმა.

 

ღონისძიება უმაღლესი სასწავლებლის საინჟინრო, ეკონომიკის, მედია-ტექნოლოგიებისა და სოციალურ მეცნიერებათა ფაკულტეტის თეოლოგიის სადოქტორო პროგრამის ფარგლებში შედგა. მამა თეოდორემ თეოლოგიის დოქტორის აკადემიური ხარისხის მოსაპოვებლად სადოქტორო ნაშრომი დაიცვა თემაზე: „საეკლესიო ვითარება და ეკლესიოლოგიური საკითხები „წმინდა გრიგოლ ხანძთელის ცხოვრების მიხედვით““. დისერტაციის ხელმძღვანელია ღვთისმეტყველების დოქტორი, დეკანოზი ლევან მათეშვილი, ოპონენტები კი – თეოლოგიის დოქტორები: დეკანოზი კახაბერ შურღაია და ირაკლი ორჟონია. სამეცნიერო საბჭოს სხდომას უძღვებოდა მანგლისისა და თეთრიწყაროს მიტროპოლიტი ანანია (ჯაფარიძე), რომელმაც აღნიშნა, რომ ეს არის პირველი სადოქტორო დისერტაცია, რომელიც ამ პროგრამის ფარგლებში ტექნიკურ უნივერსიტეტში შედგა. სამეცნიერო ნაშრომის დაცვას საქართველოს ტექნიკური უნივერსიტეტის რექტორი, პროფესორ-მასწავლებლები, სასულიერო პირები და სხვა მოწვეული სტუმრები ესწრებოდნენ.